Nahuli at isinailalim sa euthanasia ang isang buwaya na pinaniniwalaang umatake sa isang nawawalang lalaki sa Mpumalanga Province, South Africa.
Sa ulat ng Unang Balita nitong Martes, mapanonood sa isang video ang pag-airlift sa isang pulis at patay nang buwaya ng helicopter sa Komati River.
Sinabi ng South African Police Services na nahuli ang buwaya malapit sa lugar kung saan nakita ang sasakyan ng nawawalang lalaki.
Kalaunan, nakuha sa bituka ng buwaya ang ilang bahagi ng katawan ng tao.
Isasailalim ang mga parte ng katawan sa DNA test para matukoy ang pagkakakilanlan.
Patuloy ang imbestigasyon sa insidente. — Jamil Santos/VBL GMA News
