Si Secretary Renato Solidum Jr. ng Department of Science and Technology (DOST), ang may pinakamataas na kabuuang sahod at allowances na natanggap sa hanay ng mga miyembro ng Gabinete ni Pangulong Ferdinand Marcos Jr., nitong nakaraang taon, batay sa 2025 Report on Salaries and Allowances ng Commission on Audit (COA).

Ayon sa ulat ng COA, umabot sa P6.66 milyon ang kabuuang sahod at allowances ni Solidum noong nakaraang taon. Sumunod sa kaniya si Labor (DOLE) Sec. Bienvenido Laguesma, na tumanggap naman ng ng P5.97 milyon na kompensasyon.

Pangatlo si Secretary Rex Gatchalian ng Department of Social Welfare and Development (DSWD) na sumahod ng P5.49 milyon.

Kasama sa listahan ng top 10 Cabinet secretaries na may pinakamalaking sahod at allowance na natanggap noong 2025 sina:

  • Francisco Tiu Laurel, Jr.,: P5.2 milyon (Department of Agriculture)
  • Teodoro Herbosa: P5.16 milyon (Department of Health)
  • Conrado Estrella III: P5.15 milyon (Department of Agrarian Reform)
  • Andres Centino: P5 milyon (President Adviser for Maritime Concerns)
  • Eduardo Año: P4.97 milyon (National Security Adviser)
  • Antonio Lagdameo, Jr.: P4.96 milyon (Special Assistant to the President) and
  • Larry Gadon: P4.95 milyon (Presidential Adviser for Poverty Alleviation)

Pang-11 naman si Solicitor General Darlene Berberabe na may P4.92 milyon, kasunod si Defense Sec. Gilbert Teodoro Jr. na may P4.9 milyon.

Pang-13 si dating Tourism Sec. Christina Frasco na may P4.89 milyon, kasunod si Arsenio Balisacan ng Department of Economy, Planning, and Development na may P4.88 milyon.

Inihahanda ng COA ang ulat tungkol sa mga sahod at allowances upang masubaybayan ang suweldo, allowances, at benepisyo ng mga matataas na opisyal ng gobyerno na humahawak ng ibang puwesto sa iba’t ibang ahensya ng pamahalaan.

Bukod sa mga kalihim at iba pang opisyal ng pambansang pamahalaan, kasama rin sa ulat ng COA ang mga pangunahing opisyal at miyembro ng governing boards ng mga Government-Owned or Controlled Corporations (GOCCs), kabilang ang kanilang mga subsidiary, mga Water District, State Universities and Colleges (SUCs), at iba pang independenteng ahensya. -- Llanesca T. Panti/FRJ GMA News