Itinalaga ni Pangulong Ferdinand “Bongbong” Marcos Jr. ang dating Health Undersecretary na si Beverly Lorraine Ho, bilang bagong president at chief executive officer ng Philippine Health Insurance Corporation (PhilHealth).
Inilagay si Ho sa PhilHealth matapos naman na hirangin ni Marcos ang dating PhilHealth chief na si Dr. Edwin Mercado bilang bagong kalihim ng Department of Health (DOH), na ipinalit sa nagbitiw na si Dr. Jose “Brix” Pujalte.
Bago ang pagkakahirang sa Philhealth, si Ho ang Chief Healthcare Officer ng Ayala Healthcare Holdings, Inc.
Bago siya lumipat sa pribadong sektor, naging undersecretary ng DOH si Ho, at kabilang sa mga opisyal na nagsalita para sa kagawaran noong kasagsagan ng COVID-19 pandemic.
Naging undersecretary at officer-in-charge siya ng Public Health Services Team, director ng Health Promotion Bureau, at director ng Disease Prevention and Control Bureau.
Naging special assistant din si Ho ng Secretary of Health para sa Universal Health Coverage. Naging alternate representative din siya sa PhilHealth Board at chairperson ng Benefits Committee nito.
Pinamunuan din niya ang Research Division ng Health Policy Development and Planning Bureau ng DOH.
Kabilang si Ho sa Ten Outstanding Young Men noong 2022 at sa Ten Outstanding Young Women for Nation Service noong 2022.
Nagtapos siya ng medisina sa University of the Philippines at kumuha ng master’s degree in public health sa Harvard T.H. Chan School of Public Health. – Giselle Ombay/FRJ GMA News
