Sa pamamagitan ng Instagram post, ibinahagi ng singer-actor na si Mark Bautista ang nakatatakot niyang karanasan matapos umanong pagbabarilin ng hindi pa nakikilalang lalaki ang sinasakyan niyang Uber car sa Seattle, Washington.
Sa kaniyang IG account, ipinost ni Mark ang larawan ng isang sasakyan na nasa harapan ng Uber car na kaniyang sinasakyan.
Sa nabanggit na sasakyan umano nagmula ang "young black guy" na lumabas sa sunroof at basta na lang daw nagpaputok sa kanilang direksyon.
"This is the most terrifying moment ive ever experienced in my whole life," nakasaad sa caption ni Mark.
Patuloy niya, "Im happy that we're safe now but when i found out that our car was actually hit by a bullet-where i was seated, i was literally shaking and my hands were cold."
Hindi nabanggit ni Mark kung nadakip o nakilala ang namaril.
"The picture of the gunman firing two guns right in front of us is still so clear to me...it could happen to anyone and anywhere. We're indeed living in a crazy world-Be safe guys and take care of each other," paalala niya.
Ang larawan ay kuha umano sa dashcam na nakalagay sa Uber car.
Nasa Amerika ngayon si Mark para sa kaniyang musical play.
-- FRJ, GMA News
