Sumabak na sa unang araw ng taping niya dito sa Pilipinas ang Korean actor na si Alexander Lee, na leading man ni Heart Evangelista sa upcoming Kapuso series na "My Korean Jagiya." Nitong Sabado, ipinagdiwang ni Xander ang kaniyang kaarawan dito sa bansa.
Sa Chika Minute report ni Aubrey Carampel sa GMA News "24 Oras" nitong Martes, sinabi ni Xander na hindi niya naiwasan makaramdam ng nerbiyos sa unang araw ng taping.
"Everybody's like, 'Xander calm down don't be nervous, relax.' I'm not worried because everybody here is really nice Filipinos very welcoming," kuwento ng aktor na dati rin miyembro ng K-Pop group na U-Kiss.
Nitong Sabado, ipinagdiwang ni Xander ang kaniyang 29th birthday at ramdam na ramdam daw niya ang warm Filipino hospitality lalo na nang mag-host ng birthday dinner si Heart.
"She actually invited everybody to her place and it was a very wonderful birthday dinner, one of the best," saad niya.
Filipino-Spanish cuisine umano ang inihain ni Heart para sa kaniyang mga bisita, kasama ang co-stars niyang sina Janice De Lelen at Iya Villania.
"Muntik nang maiyak. Actually lagi siyang overwhelmed so it's really nice and it's a breath of fresh air to see all these actors that they're so overwhelmed, that they're in the Philippines. And tayong mga Filipino kung paano tayo [mag-asikaso] so happy sila, happy ako," anang aktres.
Balak daw ni Heart at ng mister niyang si Senador Chiz Escudero na ipasyal sa iba't ibang lugar sa bansa ang kanilang Korean co-stars.
Si Xander, excited na raw na ikutin ang Pilipinas at makasalamuha ang kaniyang Filipino fans.
"All my fans out there, all my bebot, 'My Korean Jagiya' will be coming soon so please show some love and support and we'll do our very best to make you guys happy," pag-imbita niya. -- FRJ, GMA News
