Natutuwa si Heart Evangelista na nagugustuhan ng kaniyang Korean leading man na si Alexander Lee sa upcoming primetime series na "My Korean Jagiya," ang mga pagkaing Pinoy tulad ng balut.
Sa Chika Minute report ni Cata Tibayan sa GMA News "24 Oras" nitong Miyerkules, sinabi na Korean drama with a Pinoy twist ang itatampok sa latest romantic comedy offering ng Kapuso network.
"Andaming mga nandiyan na nakain na ng sistema, kaya madami talaga sa kanila na juice ko, makaka-relate," masayang sabi ni Heart.
Ilan sa mga eksena ng serye ay kinunan sa ilang historic landmarks sa South Korea.
At kahit magkaiba ang kanilang kultura, click daw agad ang chemistry nina Heart at Alexander o Xander.
Sa guesting nina Heart at Xander sa special episode ng "Tonight with Arnold Clavio," sinabi ng Kapuso actress na game ang Korean star na tumikim ng iba't ibang Filipino delicacy tulad ng balut at sisig.
"Nakakatuwa siya kasi napaka-appreciative niya sa mga delicacies natin," ani Heart.
Sabi naman ni Xander, "I like balut, the white part, the yellow part was fine, but not the fetus part. I really like it, it was yummy."
Kumain din si Alexander ng iba't-ibang Filipino street food, kasama sina David Kim at Myke Salomon, at nagustuhan naman daw ni David ang kikiam.
Sumabak din sila sa Filipino tongue twister challenge sa iba pang guesting.
Mapapanood simula sa Lunes ang "My Korean Jagiya" pagkatapos ng "Mulawin vs Ravena." -- Jamil Santos/FRJ, GMA News
