Star-studded ang premier night ng pelikulang "Sid & Aya" (Not A Love Story) sa pangunguna ni Kapuso Primetime King Dingdong Dantes at ng aktres na si Anne Curtis.
Sa Star Bites report ni Cata Tibayan sa GMA News TV "Balitanghali," sinabing ginanap ang premier night nitong Lunes, na dinaluhan ng misis ni Dingdong na si Kapuso Primetime Queen Marian Rivera at ang kapatid ni Anne na si Jasmine Curtis-Smith, na isa nang Kapuso.
Present din sina Solenn Heusaff, Liz Uy, Raymond Gutierrez, Benjamin Alves at Gabby Eigenmann.
Ayon sa ulat, hindi ordinaryo ang istorya ng pelikula kaya excited si Dingdong na mapanood ito ng mga tao.
Dati nang sinabi ni Dingdong na mayroon itong "millennial" feel.
Gagampanan ni Dingdong ang karakter ni Sid, isang insomniac at makikilala si Aya, ang karakter ni Anne, na bibigyan niya ng kakaibang trabaho.
Ang pelikula ay sa direksyon ni Irene Villamor, na direktor din ng pelikulang "Camp Sawi". -- Jamil Santos/FRJ, GMA News
