Bigong makapasok sa shortlist sa kategoryang Best International Feature sa 98th Academy Awards o Oscars 2026, ang pambato ng Pilipinas na “Magellan.”
Sa ulat ng PEP.ph nitong Miyerkoles, sinabing inanunsyo na ng Academy of Motion Picture Arts and Sciences (AMPAS) ang shortlists sa 12 kategorya sa Oscars 2026.
Ang "Magellan" ay mula sa direkyon ni Lav Diaz, at pinagbidahan ng Mexican actor na si Gael García Bernal bilang Ferdinand Magellan. Kasama niya rito ang mga Filipino actor na sina Ronnie Lazaro, Hazel Orencio, Amado Arjay Babon, at iba pa.
Hindi rin nakalusot ang dalawa pang entry ng Pilipinas na “Food Delivery” ni Baby Ruth Villarama para sa Best Documentary, at ang “Vox Humana” ni Don Eblahan para naman sa Best Live Action Short Film.
Sa Facebook post, nagpahayag ng kalungkutan si Film Development Council of the Philippines (FDCP) Chairman Joey Reyes, pero buo pa rin ang tiwala niya sa pelikulang Pilipino.
"Ok. I'm heartbroken now. We may have fallen short to make it to the list BUT that does not mean we cannot do it. Let this be a challenge rather than a judgment,” saad ni direk Joey. "We will DESERVE it. We are Filipinos." – FRJ GMA Integrated News
