Ang tinaguriang "La Nueva Kontrabida" na si Kyline Alcantara, magiging kakaibang bida naman sa pinakabagong GMA afternoon series na "Inagaw Na Bituin."
Makakasama ni Kyline ang award-winning teen actress na si Therese Malvar pati na rin sina Gabby Eigenmann, Sunshine Dizon, Angelu de Leon, at Angelika Dela Cruz.
Ang "Inagaw Na Bituin" ay tungkol sa kahalagahan ng pamilya, pagpapatawad, at pagtanggap, ayon sa ulat ng GMA News "Unang Balita" nitong Huwebes.
"I'm just so happy po na hindi po ako nababakante. Sobrang sarap po sa pakiramdam na sobrang busy ako. Well, ito po 'yung pinagdarasal ko years before and ngayon nangyayari na siya," sabi ni Kyline.
Dagdag niya, "Ang role ko po dito, isa po akong mabait... pero hindi po ako 'yung tipikal na mabait. It's all about sisterly and family love. May musical connection din."
Excited naman si Therese sa kaniyang first-ever major kontrabida role. "Hindi lang po ito 'yung first kontrabida, but this is also my first major role in a teleserye," sabi ni Therese.
Kakaiba rin ang mapapanood na Gabby Eigenman sa series.
"I used to sing kasi, so my background of singing naman ako. I think that would be exhilarated sa personal kong buhay kasi I used to be a singer, isa sa mga first love ko 'yun e before I concentrated on acting," sabi ni Gabby.
Inihalintulad naman ni Kyline ang kaniyang sarili sa kaniyang magiging karakter.
"Isa rin po akong aspiring singer kumbaga, so ipapakita ko rin po dito kung gaano ko kamahal 'yung music natin. I just want to take me back sa dati kong character sa 'Kambal, Karibal.' Gusto ko po talaga sobrang makita 'yung difference," sabi ni Kyline. — Jamil Santos / AT, GMA News
