Nananatiling Kapuso ang batikang aktor na si Gabby Eigenmann matapos siyang pumirma muli ng exclusive contract sa GMA Network nitong Martes.

Kabilang sa mga dumalo sa contract signing ng 41-anyos na aktor AY sina GMA Network CEO and chairman Felipe L. Gozon, Senior Vice President and Entertainment Group Head Lilybeth Rasonable, Senior Assistant Vice President for Alternative Productions Gigi Santiago-Lara, at talent manager ni Gabby na si Perry Lansigan.

"For the longest time I've called this network my home," sabi ni Eigenmann. "For the past 22 years, I've always been honored and I've always felt na parte talaga ako ng network natin. Sobrang happy ako."

 

 


Ikinatuwa naman ni Atty. Gozon ang pananatili ni Gabby bilang Kapuso na umabot na sa mahigit dalawang dekada.

"Apart from loyalty, eh talaga namang magaling na artista itong si Gabby, kaya nagtatagal yan sa industriya. And the feeling is mutual, kaya tayo ay natutuwa na pumirma na naman siya sa atin," ayon kay Atty. Gozon. "22 years is a long time for an artist to stay in one place and we are so thankful for that."

Kaugnay nito, inihayag ni Gabby ang dalawang role na kaniyang ginampanan na malapit daw sa puso niya-- si Desmond Montereal sa 2011 teleserye na "Munting Heredera," at ang bading na ama na si Dading sa 2014 series na "Dading."

"What paved way talaga was the character portrayed in 'Munting Heredera,' 'yung role ni Desmond. I think that started it all," saad niya.

"I've been in the business for 22 years, 2011 ata nung nabigyan ako ng award for Best Supporting Actor. Kung baga icing on the cake yun eh, 'yun yung one of the most unforgettable characters," kuwento pa ni Gabby.

Sa pagpirma niya ng bagong kontrata, handa umano si Gabby sa anumang proyekto na ibibigay sa kaniya.— FRJ, GMA News