Gaganap ang Pinay-British actress at singer na si Christine Allado sa isang role sa "Prince of Egypt," na isang bagong musical set ng Dominion Theatre ng West End sa darating na Pebrero 25, 2020.
Gaganap si Allado bilang si Tzipporah, asawa ni Moises. Si Luke Brady naman ang magiging si Moises, sa produksiyon na idinirek ni Scott Schwartz, ayon sa ulat ng Department of Foreign Affairs.
"Christine’s performance in the musical will be another testament that Filipino talent is indeed world-class," sabi ni Philippine Ambassador to the United Kingdom Antonio M.Lagdameo.
Kilala si Allado sa kaniyang role bilang si Peggy Schuyler at Maria Reynolds sa highly-acclaimed West End musical na "Hamilton: An American Musical."
Umani ng mga papuri ang kaniyang performance sa "Hamilton" mula sa iba't ibang tanyag na publications sa US at UK.
Gumanap din si Allado bilang si Vanessa sa Olivier award-winning production ni Lin Manuel Miranda na "In the Heights"; at bilang si Maria sa "West Side Story" na 60th anniversary production ng BBC.--FRJ, GMA News
