Hindi na naging mapili pa si Rich Asuncion nang tanggapin niya ang trabaho bilang isang waitress sa Australia, lalo at dumadaan ang marami sa pagsubok ngayon sa krisis na dulot ng COVID-19 pandemic.
"Simulan natin ang post na ito nang masaya. Napakasaya ko ngayong araw dahil natanggap ko na ang una kong sweldo...at sa wakas ay di na ako nalulugmok sa lungkot," paglalahad ni Rich sa Instagram.
Ayon kay Rich, matagal siyang naghanap ng trabaho sa pag-a-adjust niya sa Australia. Marami raw ang opportunities doon basta hindi lang mapili at mas nakalulungkot kung mananatili na lang sa bahay.
Ikinasal si Rich at ang asawa niyang Fil-Aussie rugby player na si Benjamin Mudie sa Hong Kong noong Mayo 2018.
Isinilang naman ni Rich ang anak nila ni Ben na si Isabella Brie noong Disyembre 2018. —LBG, GMA News