Para kay Bela Padilla, ang kaniyang Swiss-Italian boyfriend na si Norman Bay na ang kaniyang “The One.”
“Yes or no? Is Norman ‘The One,’” tanong ni Tito Boy kay Bela sa Fast Talk segment ng “Fast Talk with Boy Abunda” nitong Biyernes.
“Yes,” tugon ni Bela. “Sana po hindi mapanood ni Norman kasi baka ma-pressure siya.”
Sa Fast Talk segment din, sinabi ni Bela na pinaka-nagustuhan niya ang pagpapakalma sa kaniya ni Norman. Si Bela naman, gustong-gustong pinaglulutuan ang kaniyang nobyo.
“He is listening,” sabi pa ng actress-director.
Bago pa sumalang sa Fast Talk with Boy Abunda, may nauna nang interview ang King of Talk kay Bela.
“Hinihimay niya ‘yung conversation natin, tinatanong niya ‘Ah bakit niya natanong sa iyo ‘to?’ or ‘Bakit ito ‘yung naging sagot mo?’”
Kung si Bela ang magdidirek ng love story nila ni Norman, sinabi niyang uumpisahan niya ang pelikula sa eksena ng kanilang kasal.
“‘Yung past movies ko or movies ko na napapanood nila, either malungkot ‘yung ending or open ang ending. So I would like it to be an open ending. We start happy then we see where we go,” paliwanag niya.-- FRJ, GMA Integrated News
