MTRCB, iginiit ang limitasyon sa freedom of expression sa X rating nito sa 'Alipato at Muog'

Iginiit ng Movie and Television Review and Classification Board (MTRCB) nitong Martes na may limitasyon sa kalayaan sa pamamahayag nang bigyan nito ng X rating ang dokumentaryong pelikula na "Alipato at Muog."

Ito ang pahayag ni MTRCB Chairperson Lala Sotto-Antonio sa pagdinig ng Senate finance subcommittee sa mungkahing P164 million budyet ng ahensiya para sa 2025.

Sa naturang pagdinig, sinabi ni Senador Jinggoy Estrada ang tungkol sa mga apela ng direktor ng pelikulang dokumentaryo na si JL Burgos, ng University of the Philippines (UP) Cinema, at ng National Union of Journalist of the Philippines (NUJP), na humihiling na ikonsidera ng MTRCB ang desisyon nito.
Iginiit nito ang karapatan ng mga Pilipino sa malayang pagpapahayag ng kanilang mga saloobin.

"On freedom of expression, we all know that freedom of expression is not absolute nor limitless. That is why there is a law in place. That is why there exists the MTRCB. That is why we have the Presidential Decree of 1986 to follow, because there is a law. Laws and rules are important in order to put order," paliwanag ni Sotto-Antonio.

"We have a law to follow. It has been found to be violative and we have indicated already the reason why it was X-ed (rated X). It is the section 3(c)(ii) of PD 1986," dagdag pa niya, at iginiit na ang pelikula, "tends to undermine the faith and confidence of the people in their government or duly-constituted authorities."

Nanindigan ang tagapangulo ng MTRCB na hindi nila nilalabag ang karapatan sa kalayaan sa pamamahayag dahil binanggit niyang nagbigay sila ng exemption permit para sa public exhibition ng documentary film sa Cinemalaya Film Festival ngayong taon.

"That is not curtailing freedom of expression nor creation. They have also conducted academic film showings which we did not stop them from. That is not curtailing freedom of expression" sabi niya.

Dahil opisyal nang isinumite ng direktor ng documentary film ang kanilang apela, sinabi ni Sotto-Antonio na nakatakda na ang MTRCB para sa ikalawang pagsusuri nito sa Setyembre 5.

Ang "Alipato at Muog" ay isang independently produced na documentary film tungkol sa paghahanap ng katotohanan sa likod ng pagdukot sa aktibistang si Jonas Burgos noong 2007. Si Jonas ay kapatid ni JL Burgos, na direktor ng pelikula.

Nag-premiere ang dokumentaryong pelikula sa Cinemalaya Film Festival ngayong taon at ginawaran ng Special Jury Award para sa full length film.--Jamil Santos/FRJ, GMA Integrated News