Pumanaw na ang American actress na si Michelle Trachtenberg, na tumatak sa mga manonood sa kaniyang hit TV series noon na "Buffy the Vampire Slayer" at "Gossip Girl."
Ayon sa kaniyang public relations team, pumanaw si Michelle, 39-anyos, nitong Miyerkules, pero hindi inihayag ang sanhi ng kaniyang pagpanaw.
"It is with great sadness to confirm that Michelle Trachtenberg has passed away. The family requests privacy for their loss. There are no further details at this time," saad sa inilabas na pahayag
Isinilang si Michelle noong October 11, 1985, sa New York City, at Jewish immigrant ang kaniyang mga magulang.
Nagsimula si Michelle sa paglabas sa commercial sa edad na tatlo. Una naman niyang naging TV project ang Nickelodeon series na "The Adventures of Pete & Pete" noong 1994.
Sa edad na 10, nakuha niya ang kaniyang first title role sa 1996 movie na "Harriet the Spy."
Nakasama rin si Michelle sa cult classic na "EuroTrip" noong 2004. Hanggang sa mapabilang siya sa cast ng WB supernatural drama na "Buffy the Vampire Slayer" noong 2000 bilang si Dawn Summers. At si Georgina Sparks sa CW television series na "Gossip Girl" noong 2007.
Lumabas din siya sa ilang television films katulad ng "Killing Kennedy," "Sister Cities," at "The Scribbler." Maging sa mga music videos, kabilang ang idinerek ni Joaquin Phoenix para sa "Tired of Being Sorry" ng Ringside. — mula sa ulat ng Reuters/FRJ, GMA Integrated News
