Mission accomplished si Alden Richards nang personal niyang makaharap at kausap ang Hollywood star na si Tom Cruise na mapapanood muli sa bagong yugto ng action movie nito na "Mission Impossible."
"Ethan meets Ethan," saad ni Alden sa caption sa video post niya sa Instagram sa pagkikita nila ni Tom.
"I have no words!," dagdag pa ni Alden na "Ethan" ang pangalan ng karakter sa movie nila ni Kathryn Bernardo na "Hello Love Again."
Samantalang "Ethan" din ang pangalan ni Tom sa kaniyang franchise movie na "Mission Impossible."
Nagkita ang dalawa sa movie premiere ng bagong Mission: Impossible - The Final Reckoning na ginanap sa Seoul, South Korea.
Sa video, makikitang nagkamay ang dalawa at nagpakuha ng larawan.
Makikita rin na pakikinig at ngumingiti si Tom sa mga sinasabi sa kaniya ni Alden.
Nag-post naman sa IG ang Paramount Pictures Philippines ng larawan ni Alden sa pagdalo niya premiere at nilagyan ng caption na "Welcome to the IMF, Agent @aldenrichards02."
Kamakailan lang, sina Alden at Kathryn ang itinanghal na 2024 Box Office King ng Cinema Exhibitors Association of the Philippines (CEAP) para sa pelikula nilang "Hello, Love, Again."
Nakatakdang maging host si Alden ng upcoming reality dance competition na "Stars On The Floor" sa GMA na mapapanood sa June. -- FRJ, GMA Integrated News
