Inihayag ni Alden Richards na mas mabuti na ang pakiramdam niya ngayon matapos ang pinagdaanang pagsubok sa buhay noong 2024 na nauna niyang inilarawan na "lowest year" niya. 

Sa Chika Minute report ni Aubrey Carampel sa GMA News "24 Oras" nitong Biyernes, sinabi ni Alden na, "I'm above my demons right now," patungkol sa mga sitwasyon sa kaniyang buhay. 

"I have never been better. Right now, after recovering from that, actually in our daily lives hindi mo naman talaga sasabihin na naka-recover ka eh. I mean, in situations like that hindi mo masabing, 'Ay okay na 'ko.' Hindi siya ganun," pahayag ng aktor.

"Sabi nga ni Ancient One sa 'Doctor Strange' film, you never really lose your demons, you just learn to live above them, and I'm above my demons right now. I know how to manage them," dagdag niya. 

Maraming pinagkakaabalahan ngayon si Alden gaya ng cycling, running, at pagwo-workout. Noon, pinapilit umano niya ang sarili na gawin ang mga aktibidad na ito.

"During my lowest, pinipilit ko siya, even with the days na ayokong bumangon. Pinipilit ko siya until such time na hinahanap na siya ng katawan ko. Right now, I'm more present. I'm more present for myself, so I can be present for other people," pagbahagi niya. 

Kabilang din sa pinagkaabalahan ni Alden ang pelikulang "Out of Order," na siya rin ang nagdirek. Ipapalabas ito sa competition section ng Da Nang Film Festival sa Vietnam mula June 29 hanggang July 5. 

"Umiyak ako niyan in secret when we got the news. They were very glad to know na ito 'yung very first directorial job ko, so it's a newbie director and they're a fan of that. Gustong-gusto nila 'yung new blood, and hopefully sana kahit papaano manalo tayo ng award," ayon kay Alden. 

Nakatakda ring lumipad patungong United States si Alden bilang paghahanda naman sa isang Hollywood film.

Bukod sa mga pelikula, magiging host din si Alden sa upcoming reality dance competition na "Stars on the Floor," kasama sina Marian Rivera, Pokwang, at SB19 choreographer Jay Roncesvalles, magsisilbing mga judge. 

Mapapanood ang "Stars on the Floor" simula sa June 28 sa GMA Network. —FRJ, GMA Integrated News