Bukod sa physical training, naging bahagi rin ng pahahanda ni David Licauco sa kaniyang role na investigative vlogger sa upcoming Kapuso series na “Never Say Die,” ang alamin kung papaano maging isang tunay na broadcast journalist.
Sa Chika Minute report ni Nelson Canlas sa “24 Oras” nitong Biyernes, ibinahagi ni David ang ilang detalye tungkol sa kaniyang karakter.
“‘Yung role ko sa ‘Never Say Die,’ isa akong vlogger na journalist. Through my videos, maybe on platforms, doon ko na-e-express kung ano ‘yung gusto ko at ayaw ko sa Philippines,” anang aktor.
Para maging makatotohanan ang kaniyang pagganap, isang veteran journo mula sa Super Radyo dzBB ang nagbigay sa kaniya ng pointers tungkol sa naturang propesyon.
“We had a meeting with Boss Orly [Trinidad] of DZBB, he was very insightful. ‘Yung role ko dito eh medyo similar sa ginagawa niya, so it was just nice for the production to, you know, to think about it, to pick up the knowledge from someone na batikan na sa larangan niya,” ayon sa aktor.
Dahil dito, marami raw natutunan si David sa bago niyang role maging sa pagiging isang broadcast journo.
“When you hear about being a radio broadcaster, you would automatically think na kailangan ‘yung boses mo deep, very straightforward, but actually sinabi sa akin ni Boss Orly na siyempre it will also matter ‘yung kung sino ‘yung nakikinig,” kuwento niya.
“You have to pivot and learn kung paano gusto mapakinggan ng isang Gen Z or millennial ‘yung news,” dagdag niya.
Makakasama ni David sa “Never Say Die” si Jillian Ward, kabilang sina Kim Ji Soo, Richard Yap, Gina Alajar, Raymart Santiago, Angelu De Leon, Wendell Ramos, Ayen Munji-Laurel, Analyn Barro, Tanjo Villoso, at Michelle Dee. —FRJ GMA Integrated News
