Inihayag ni Beauty Gonzalez ang kaniyang pasasalamat sa asawang si Norman Crisologo, na full support sa kaniyang trabaho kahit mayroong maselang eksena.

“Actually si Norman watch everyday and yesterday napanood niya 'yung episode na pinalayas kami ng tatay ko, umiyak din siya. I mean super supportive siya sa work ko,” sabi ni Beauty sa kaniyang guesting sa “Fast Talk with Boy Abunda” nitong Miyerkoles, patungkol sa bago niyang afternoon series na “House of Lies.”

“He's so excited, he's so happy kasi each character I portray daw, ibang characteristic and personality ang nalalabas ko. Super thankful ako,” dagdag ni Beauty.

Biro pa ng aktres, nagsisipilyo naman siya bago umuwi.

“I just make sure I brush my teeth every time I go home. Siyempre ka-kissing scene ko ‘di ba? But nothing, we're a team, me and Norman,” saad ni Beauty.

Nakisali rin si Beauty sa 2016 throwback trend, kung saan buntis pa siya noon sa kaniyang anak na si Olivia. Itinuturing niya si Norman bilang isa sa kaniyang mga blessing sa buhay.

“I was pregnant when I lived in 2016. And then, that year I became a mom also. And it's surprising na it's the best blessing I've ever had. When I had her in my life, dumating lahat ng mga breaks ko sa trabaho ko. Dumating ‘yung biggest blessing ko si Norman and everyone. Super thankful,” ani Beauty.

Pinasalamatan pa ng aktres ang asawa sa pagsuporta at pag-alalay nito sa kaniyang pagiging isang ina.

“I thank a lot for Norman. Kasi he helped me in a lot of ways to make it easy for me. And na-enjoy ko talaga ang pagiging mom ko, kasi supportive siya eh. He let me do my work. And at the same time, he doesn't pressure me as, ‘Okay lang ‘yan. You don't have to be hard on yourself.’ He's so relaxed eh. So it helped a lot,” patuloy niya.

“And then kahit nasa trabaho ko, hindi ako nag-worry kung kumusta si Olivia. Kasi alam kong andiyan ‘yung daddy niya,” sabi pa ni Beauty.

Ayon pa kay Beauty, wala silang inililihim ni Norman sa isa’t isa, at  tiwala sila sa isa’t isa. Hindi rin umano nila tinitingnan ang cellphone ng isa’t isa.

Ikinasal sina Beauty at Norman noong 2017.

Gumaganap si Beauty bilang si Marjorie "Marj" Castillo-Torrecampo sa “House of Lies,” na nag-premiere nitong Lunes. Bahagi rin ng cast sina Mike Tan, Martin del Rosario, Jackie Lou Blanco, Snooky Serna, Kokoy De Santos, at marami pang iba.

Napanonood ang House of Lies ng 3:20 p.m. sa GMA Afternoon Prime.—FRJ GMA Integrated News