Bangkay na at palutang-lutang nang matagpuan sa kanal ang isang nawawalang 82-anyos na Pinoy sa Torrance, California.
Sa ulat ng GMA News "Unang Balita" nitong Huwebes, kinilala ang biktima na si Francisco Candelario, na huling nakita sakay ng kaniyang mini-van noong Abril 2.
Lunes na nang matagpuan ang katawan ni Candelario sa isang kanal na mahigit limang kilometro mula sa kaniyang sasakyan.
Pagkalunod o homicide ang mga tinitingnang anggulo ngayon ng mga awtoridad.
Hinihintay naman ang resulta ng autopsy sa biktima, at forensic examination sa kaniyang mini-van. — Jamil Santos/MDM, GMA News
