NEW YORK - Libo-libong Pinoy ang dumayo sa New York City nitong Linggo para ipagdiwang ang ika-124 na anibersaryo ng Philippine Independence Day.

Muling isinara ang ilang kalsada at ang kahabaan ng Madison Avenue sa Manhattan sa New York City para sa selebrasyon na dinaluhan ng 121 Filipino community organizations mula pa sa iba't-ibang panig ng Amerika.

Ang ika-124 Independence Day celebration na inorganisa ng Philippine Independence Day Council (PDIC) isang linggo bago ang June 12 na Indendence Day ay isa sa pinakamalaking parada ng mga Pilipino sa Amerika simula nang magkaroon ng pandemiya.

Kasama rin sa parada ang GMA Pinoy TV at ang dating Eat Bulaga host na si Ruby Rodriguez.

 

 

 

 

 

 

 

 

Pinalakpakan hindi lamang ng mga kababayan nating Pinoy kundi maging ng mga banyaga ang mga kasapi ng Philippine Nurses Association of America na naging frontliner sa kasagsagan ng COVID-19 pandemic sa buong Estados Unidos.

Takaw pansin naman ang makulay na kasuotan ng grupo ng mga Sinulog at Sto. Niño devotees na rumampa sa Madison Avenue.

Kasama rin sa parada ng mga tagasuporta ni incoming President Ferdinand "Bongbong" Marcos Jr. na nanawagan ng pagkakaisa para sa bagong Pilipinas.

Bahagya namang nagka-tensyon matapos pagbawalan ng PIDC ang mga militanteng grupo na kasama sa selebrasyon na batikusin ang gobyerno.

Ayon kay Rely Manacay ng PIDC, hindi ito ang tamang panahon para isigaw ang problema nila sa gobyerno dahil ito ay selebrasyon ng kasarinlan ng Pilipinas.

Sa kabuuan, nagtapos nang masaya at mapayapa ang pagdiriwang ng ika-124 Philippine Independence day sa New York City. —KG, GMA News