Nasawi at napugutan ang isang rider nang bumangga ang minamaneho niyang motorsiklo sa kasalubong na pampasaherong jeepney sa Opol, Misamis Oriental.
Sa ulat ni Cyril Chaves sa GMA Regional TV One Mindanao nitong Martes, kinilala ang biktima na si Elpidio Magpulong, 59-anyos, residente sa Cagayan de Oro.
Ayon sa pulisya, nag-overtake umano ang motorsiklo ng biktima na patungo sa CDO at napunta sa linya ng jeepney kaya nangyari ang banggaan.
“Didto na sa nahitaboan nag-counterflow ang motor, dili na mao ang linya nga iyang gidaganan, kumbaga, nag-swerve siya sa lain nga lane, misulod siya sa linya sa jeep nga diha gaagi ug nahitabo nga nagbangga sila ug mao’y hinungdan nga natumba ang motor, nahulog ang driver ug wala gyud malikayi,” ayon kay Opol Municipal Police Station Traffic Investigator, Senior Master Sergeant Arniel Villamor.
Ayon pa sa pulisya, nakainom umano ang biktima nang mangyari ang trahedya.
Nakipag-usap na rin umano ang driver at operator ng jeepney sa pamilya ng biktima.
Paalala ng pulisya, huwag magmaneho kung nakainom para makaiwas sa disgrasya.-- FRJ, GMA Integrated News
