Halos kompleto na ang tropa ng Voltes V Team na sasagupa sa Boazanians Team matapos ipakilala kung sino ang gaganap bilang si Commander Robinson at si Dr. Hook.
Sa Chika Minute report ni Nelson Canlas sa GMA News "24 Oras" nitong Miyerkoles, sinabing si Gabby Eigenmann ang napiling gumanap bilang si Commander Robinson, ang ama ni Voltes V pilot Jamie Robinson, lider ng Earth Defense Force at kasama sa nagdisenyo kay Voltes V.
Samantala, si Neil Ryan Sese naman ang gaganap bilang si Dr. Hook, isa sa mga scientist ng Earth Defense Force, at nasa likod ng "Spin Fly Technique" ni Voltes V.
Kasama nina Gabby at Neil sa Voltes V Team sina Miguel Tanfelix (Steve Armstrong), Ysabel Ortega (Jamie Robinson), Radson Flores (Mark Gordon), Matt Lozano (Big Bert) at Raphael Landicho (Little Jon).
Samantala, kabilang naman sa Boazanians Team sina Martin Del Rosario [Prince Zardoz], Liezel Lopez [Princess Zandra], Epy Quizon [Zuhl] at si Carlo Gonzalez [Draco]. —FRJ, GMA News
