Inaresto ang isang Estonian vlogger sa Dumaguete City na tumawag na mukhang unggoy ang mga Pinoy sa kaniyang video content, matapos na malaman na overstaying na siya sa Pilipinas.
Sa press conference nitong Huwebes ni Department of the Interior and Local Government (DILG) Secretary Jonvic Remulla, iprinisenta sa media ang inarestong dayuhan na si Siim Roosipuu, 34-anyos.
“Meron kaming nahuling isang Siim Roosipuu. Isa po siyang Estonian. Umiikot po siya sa Dumaguete at nagba-vlog siya,” ani Remulla.
“Si Siim po ay overstaying sa Pilipinas nang ilang linggo na. Ang last extension niya ay hanggang January 1 lamang. Ngunit dahil siya ay nahuli, siya po ay dadalhin sa trial court,” dagdag niya.
Kakasuhan si Roosipuu ng paglabag sa Anti-Photo and Video Voyeurism Act of 2009 in relation to Cybercrime Prevention Act of 2012, ayon kay Remulla.
Inaresto si Roosipuu ng mga tauhan ng Bureau of Immigration (BI) Intelligence and Anti-terrorist group noong January 15 sa inuupahan niyang bahay.
Sa video ni Roosipuu, makikita siya na nag-iikot at nagsasabi na mukhang unggoy ang mga tao sa paligid at ginagaya ang tinig ng unggoy.
May video rin si Roosipuu na ginagawang content ang mga kabataang babae at tinatanong ng hindi kaiga-igayang mga bagay, ayon sa BI.
“The Philippines is not a content playground,” Viado said. “We welcome tourists and legitimate creators, but anyone who exploits our people for views, clicks, or profit will face arrest, deportation, and blacklisting,” ayon kay BI Commissioner Joel Anthony Viado.
“If you come here to provoke, insult, or humiliate Filipinos, your stay will be short and your exit will be permanent,” dagdag niya. — Joviland Rita/FRJ GMA Integrated News
