Isang isda ang bumasag sa world record ng “deepest fish ever filmed on camera” matapos itong makunan sa lalim na 8,336 metro sa Izu-Ogasawara Trench sa Japan. Ang isda, kamangha-mangha ang hitsura.
Sa ulat ng GMA News Feed, sinabing may nahuling specimens ang mga siyentipiko sa lalim na 8,022 meters, at binasag din ang world record ng “deepest fish ever caught.”
Hugis tadpole ang isda, may maliit na mata, at translucent ang balat.
Sinabi ng mga siyentipiko na isang uri ng snailfish ang kanilang nakuhanan ng footage at ang kanilang mga nahuling isda.
Ngunit nakagugulat na hindi deep sea fish ang mga ito.
“Their family is called Liparidae and there are 300 species at least of snailfish. Most of them are very, very shallow. Some of them are even in estuaries so they are not what we would consider a deep sea fish, but they have speciated into every corner of the globe and they have overtaken all the deep sea fish. So these ones you see in the video are 1,000 meters deeper than what you would normally think of as being a deep sea fish,” sabi ng chief scientist na si Prof. Alan Jamieson.
Nakunan ang footage at nahuli ang mga isda sa gitna ng isinasagawang pag-aaral ng University of Western Australia at ng Tokyo University of Marine Science and Technology tungkol sa deepest fish population sa mundo.
Sa survey, tatlong sea robots na may high-resolution cameras ang inihulog sa tatlong trenches na may magkakaibang lalim.
Bago nito, nasa 7,703 metro ang pinakamalalim na dagat kung saan namataan ang deepest snailfish.
Ito rin ang kauna-unahang pagkakataon na may nahuling isda sa lalim ng mahigit 8,000 metro.
“Even if you watch the best documentaries in the world, they will still tell you that the deep sea is this cold dark alien place full of monsters and therefore we do not appreciate the fact that it is fundamentally most of planet Earth and the resources should be put into understanding it,” sabi ni Jamieson.-- FRJ, GMA Integrated News
