Iginiit ni Dapitan City Mayor at spokesperson ng Jalosjos family na si Bullet Jalosjos na pagmamay-ari ng kanilang kumpanya ang Eat Bulaga, habang dapat ding pasalamatan ang mga creative at staff na nagtatrabaho sa likod ng camera.

“Who owns the name Eat Bulaga?” tanong ng showbiz reporter na si Nelson Canlas kay Jalosjos sa “Updated with Nelson Canlas” podcast.

“Ang Eat Bulaga po, amin po. Like I said it was a collective effort. Kung si Joey man was part of creating the idea, it shouldn't just stop there kasi siyempre the chairman will approve everything,” sabi ni Jalosjos, na tinutukoy ang ama niyang si Romeo Jalosjos Sr.

Ayon kay Jalosjos, nagkuwento sa kaniya ang kaniyang ama na binigyan ito ng listahan noon ng mga posibleng pangalan para sa kanilang programa, at siya ang nag-approve nito.

“There were different names that they thought of, hindi lang naman Eat Bulaga yung lumabas na idea, marami pang ibang could have been names, pero my dad chose ‘Eat Bulaga.’”

“As far as the company is concerned legally, we own the trademark, we own the show, we own the name, so hindi po talaga puwedeng makuha sa amin ‘yon,” dagdag ni Jalosjos.

Samantala, ang mga kontrata rin ng GMA ay nasa TAPE - Eat Bulaga, ayon kay Jalosjos.

“Parang bahay ‘yan eh. Kapag umalis ka ng bahay, you can’t bring the number of your house kung nasaan ka lumipat,” giit ni Jalosjos.

Natanong din si Jalosjos tungkol sa kung sino ang dapat magmay-ari ng mga salitang “Dabarkads” at “mula Batanes hanggang Jolo.”

“I will leave it to lawyers, pero kami, nagpakita kami ng mga papel, all the evidence to prove na contrary to their side na ang palagi lang nilang sinasabi na sila ang gumawa nito, sila ang gumawa ng ganiyan, let’s also owe it to the people na tumulong naman to create it.”

“I don’t think you need to be a lawyer or an expert to understand na during time of employment, whether you are a creative or you produced a name, you produced a song or an idea within time of employment sa isang kumpanya, everything na lumabas diyan is the property of the company, dahil binabayaran ka noon eh,” giit ni Jalosjos.

“At the end of the day we have to look back into the records and paperwork, and kung sino talaga ang nag-register ng trademark, doon talaga iyon, may batas tayong sinusundan.”

Nauna nang idiniin ni Jalosjos na handa silang kasuhan ang sinomang gagamit ng titulong Eat Bulaga.

“Of course. Like I said I would leave it to our legal team, pero that is already trademark infringement. Hindi naman po namin puwedeng bitawan din ‘yun, hindi namin puwedeng sabihin out of respect, ‘Sige gamitin niyo na lang.’ Hindi eh, meron kaming rights, meron kaming kumpanya, the company has rights, has done all these things necessary… bakit namin bibitawan yun?” — DVM, GMA Integrated News