Engaged na ang Kapuso host at weatherman na si Anjo Pertierra sa kaniyang girlfriend na si Eunice Jorge.
Inanunsyo ito ng host ng "Unang Hirit" sa Instagram post, na makikita ang larawan nila ni Eunice, na ipinakita rin ang engagement ring.
"It's true," saad ni Anjo sa caption. "Someday, someone will love and accept you for who you are. If that person comes, don't let go."
"Found mine," dagdag niya.
Sa kaniyang Instagram account, ibinahagi naman ni Eunice, isang musician, ang video ng proposal, na madidinig ang awitin niyang "Respeto."
Nasa stage si Eunice nang lumuhod sa harap niya si Anjo at nag-propose. Madidinig ang hiyawan ng mga tao.
Nakamit naman ni Anjo ang matamis na “oo” ni Eunice, na nangyari sa kaniyang kaarawan.
"I wrote ‘Respeto’ (song in the background) way back 2012 not knowing for whom or about whom I was really singing," saad ni Eunice sa post. "Napanaginipan ko lang isang tao na walang mukha at sinulat ko yung pinaramdam niya sakin and last night biglang nagmake sense lahat."
"Nakakasabog ng utak at puso wala akong masabi. What did I do to deserve a love like this?" dagdag niya. "It’s my birthday and I just got engaged."
Nagpasalamat si Eunice sa mga taong nagtungo sa event at naging bahagi ng kaniyang kasiyahan.
"I love you, weatherman," patungkol ni Eunice kay Anjo.
—FRJ, GMA Integrated News
