Inilahad ng Filipino-American mixed martial artist na si Mark ‘Mugen’ Striegl, at CrossFit athlete na si Lara Liwanag, na “surreal” ang kanilang karanasan na makasama ang “Pambansang Kamao” na si Manny Pacquiao sa reality competition series na “Physical: Asia.”
“Sobrang surreal for my end, kasi hindi ko din expect na makakasama ko siya. Parang 'yung idol ko nandiyan lang sa tabi ko,” sabi ni Lara sa guesting nila ni Mark sa “Fast Talk with Boy Abunda” nitong Huwebes.
“Pero knowing na lahat sila nagagalingan dito, ibig sabihin ang tingin nila kay PacMan talaga sobrang taas. Siya 'yung pinaka sikat na nandoon na athlete,” pagpapatuloy ni Lara.
Si Mark naman, inihayag din ang papuri kay Manny bilang kanilang team captain.
“Amazing, he's the one and only Manny Pacquiao. Like Lara said, it was surreal competing alongside him. I remember one time, in between shoots, we were sitting on the side waiting for our turn, and he was just giving us tips on eating bananas for potassium, and sharing the importance of being hydrated for competitions. He was so cool,” ani Mark.
Hinangaaan din ni Lara si Manny sa pagiging madasalin nito.
“Tsaka ‘yung nagustuhan ko sa kaniya, lahat ng quest namin, sobrang faithful niya kay Lord. As in, nanghihingi siya ng guidance, mag-start siya ng prayer before we start. It's more of asking guidance lang sa quests,” kuwento ni Lara.
Bukod kina Mark and Lara, binubuo rin nina Ray Jefferson Querubin, Justin Coveney, at Robyn Lauren Brown ang Team Philippines sa series.
Pero dahil sa isang “obligasyon,” kinakailangang mag-exit ni Manny sa “Physical: Asia” kahit hindi pa tapos ang laban ng team Philippines. Pinalitan siya ni Justin Hernandez.
Kinalaunan, nalaglag na ang Team Philippine, at naging ikatlong grupo o bansa na natanggal sa kompetisyon.—FRJ GMA Integrated News
