Inirekomenda na ng Departments of Environment and Natural Resources, Interior and Local Government, at Tourism na isara ang Boracay na hindi hihigit ng isang taon para maisagawa ang rehabilitasyon sa isla.
Inihayag nina Environment Secretary Roy Cimatu, Interior officer-in-charge Eduardo Año, at Tourism Secretary Wanda Teo, ang kanilang rekomendasyon kay Pangulong Rodrigo Duterte nitong Huwebes.
“For public health, public interest, and general welfare, I recommend to the President the closure of Boracay island as tourist destination for a maximum of one year effective one month after the declaration,” sabi ni Cimatu sa pahayag.
Kabilang sa mga inirekomendang gawin sa isla habang sarado ang mga sumusunod:
• Ayusin ang sewerage system, kasama ang sewer lines na naayos bilang isang major tourist destination
• Paglalagay ng nararapat na solid waste management facilities at mekanismo para makasunod sa probisyon ng Ecological Solid Waste Management Act
• Pag-alis sa mga illegal structure sa forestlands at wetlands, easement areas at geologically hazardous areas tulad ng mga may sink hole
• Pagpapalawak sa mga kalsada, pipe laying at excavations, at
• Pagpapahusay sa transportation system.
Sinabi ni Cimatu na kailangang isagawa ang pansamantalang pagsasara sa isla para na rin sa kapakanan at pangmatagalang pakinabang sa Boracay bilang isang prime tourism destination. —FRJ, GMA News
