Pinawalang-bisa ni Pangulong Rodrigo Duterte ang amnestiya na ibinigay kay opposition Senator Antonio Trillanes IV noong 2010 kaugnay sa pagkakasangkot niya sa umano'y kudeta laban sa administrasyong Arroyo. Pero giit ni Trillanes, kalokohan at panggigipit sa kritiko ng gobyerno ang ginawa ng pangulo.

Sa pulong balitaan nitong Martes, kinumpirma ni Justice Secretary Menardo Guevarra ang pagpapawalang-bisa sa amnestiya ni Trillanes na ibinigay ni dating Pangulong Benigno Aquino III.

Batay sa Proclamation No. 572 na pinirmahan ni Duterte noong August 31,  2018, nakasaad na walang bisa mula pa simula ang amnestiya na ibinigay kay Trillanes dahil hindi ito tumugon sa "minimum requirements to qualify under the amnesty proclamation."

Binanggit ng Pangulo ang isang sertipikasyon mula sa Armed Forces of the Philippines' Office of the Deputy Chief of Staff for Personnel, na nagsasabing walang makitang kopya ng aplikasyon ni Trillanes para mabigyan ng amnestiya.

Nakasaad din sa proklamasyon na hindi umano umamin sa kaniyang pagkakasala si Trillanes, dating Navy officer bago pumasok sa pulitika, kaugnay sa pagkakasangkot sa Oakwood Mutiny noong 2003 at Manila Peninsula Siege noong 2007.

"Despite former LTSG (Lieutenant Senior Grade) Trillanes IV’s failure to apply for amnesty and refusal to admit his guilt, his name was nonetheless included among those granted amnesty pursuant to Department of National Defense [DND] Ad Hoc Committee Resolution No. 2 approved by former Secretary of National Defense Voltaire T. Gazmin," ayon sa proklamasyon.

Kabilang si Trillanes sa mga tinatawag na "Magdalo" soldiers na binigyan ng amnestiya ni Aquino sa bisa ng Proclamation 75, na inilabas noong November 2010.

Nagsumite sila ng amnesty application sa DND noong January 5, 2011.

Ipinadala naman ang naturang amnesty proclamation sa Kongreso para sa kanilang pagsang-ayon.

ISANG MALAKING KALOKOHAN

Bilang tugon, sinabi ni Trillanes na taliwas sa nakasaad sa Proclamation 572, humiling umano siya ng amnestiya at sinunod ang lahat ng rekisito.

"Ito ay isang malaking kalokohan. Alam niyo po hindi naman ako bibigyan ng amnesty kung hindi ako nag-comply sa mga requirements," saad ni Trillanes sa mga mamamahayag.

"Sumumpa ako kay former Secretary of Defense Voltaire Gazmin at mapapatotohanan 'yan ng DND officials. Absolutely complied lahat 'yan," dagdag pa ng senador.

Tinawag ni Trillanes na panggigipit sa mga kritiko ng gobyerno ang ginawa ni Duterte.

EPEKTIBO KAAGAD

Kasama sa direktiba sa proklamasyon ang agad na pag-aresto kay Trillanes, "so that he can be recommitted to the detention facility where he had been incarcerated for him to stand trial for crimes he is charged with.”

Inatasan din niya ang Department of Justice at Court Martial ng AFP na ituloy ang pagdinig sa mga kaso ng senador kaugnay sa nangyaring insidente noon sa Oakwood at Manila Peninsula.

Sabi ni Secretary Guevarra, na itinalagang officer-in-charge sa pamahalaan habang nasa Israel si Duterte, maaari nang arestuhin si Trillanes.

"I guess all of these [cases] would have to proceed and if taking him into custody is an automatic effect of that, then so be it," sabi ni Guevarra. -- FRJ, GMA News