Nagbitiw sa puwesto ang senior vice president ng Philippine Health Insurance Corporation (PhilHealth) sa harap ng isinasagawang imbestigasyon ng Senado tungkol sa umano'y katiwalian sa ahensiya.
Sa sulat na ipinadala kay Senate President Vicente Sotto III nitong Huwebes, inihayag ni PhilHealth SVP Augustus de Villa, na nagbitiw na siya sa kaniyang puwesto.
"I hereby tender my irrevocable resignation, effective immediately... The Vice Chairman knows full well the reasons," saad nito sa sulat.
"Be assured that I will make myself available for the ongoing investigations in aid of legislation in both Houses of the Congress of the Philippines," dagdag niya.
Sinabi ni Sotto na dapat na may magandang dahilan si De Villa sa ginawang pagbibitiw.
Kabilang si De Villa sa mga opisyal ng PhilHealth na dumalo sa nakaraang pagdinig ng Senado kaugnay sa umano'y overpriced ICT equipment ng ahensiya.
Sa naturang pagdinig, inatasan si De Villa na isumite sa kapulungan ang mga dokumento tungkol sa naturang proyekto ng ahensiya.
Ayon kay Senador Francis "Kiko" Pangilinan, dapat sumunod na rin kay De Villa ang iba pang opisyal ng PhilHealth.
"I think all senior executives should, out of delicadeza, resign. But unless [Health Secretary Francisco] Duque resigns then we will see little or no progress in effectively managing the pandemic," saad niya.
Sa naturang pagdinig, itinanggi naman ni PhilHealth chief Ricardo Morales na pinoprotektahan niya ang katiwalian sa ahensiya.
Ipagpapatuloy ng Senado sa susunod na linggo ang pagdinig sa PhilHealth, habang nagsasagawa rin ng hiwalay na imbestigasyon ang Kamara de Representantes.— FRJ, GMA News
