Sen. Gordon, pumalag sa pahayag ni Pres. Duterte sa PRC na 'mukhang pera'

Sinisi ni Senador Richard Gordon si Health Secretary Francisco Duque III sa pagsambit ni Pangulong Rodrigo Duterte na ’mukhang pera' ang pinamumunuan niyang Philippine Red Cross.

"I think he [Duterte] was misled by the statement because the way the predicate was laid by Secretary Duque was wrong," sabi ni Gordon sa virtual press chat nitong Biyernes.

"Sinabi niya, 'Nag-test na ulit nung binayaran'," dagdag ng senador.

Itinigil ng PRC ang pagproseso sa COVID-19 test na binabayaran ng PhilHealth matapos lumobo sa P930 milyon ang utang nito.

Hinihintay ng PhilHealth ang clearance mula sa Department of Justice bago maglabas ng paunang bayad sa utang sa PRC.

Sa pulong nitong Huwebes, sinabi ni Duque sa pangulo na ipinagpatuloy na ng PRC ang testing sa swab specimens matapos magbayad ang PhilHealth ng paunang P500 milyon.

Ayon kay Gordon, umabot ang COVID-19 test ng PRC sa 10,000 bawat araw.

"At binaba na namin ang hinihinging presyo ng PhilHealth,"  ani Gordon. "If they (PhilHealth) continues to pay the P100 million regularly, bababa ang cost to P3,300 or P3,200."

'Not presidential'

Bagaman hindi umano nasaktan si Gordon sa pahayag ni Duterte sa PRC, sinabi naman ng senador na dapat maging maingat ang pangulo sa mga binibitiwang salita.

"I think the President should really be careful. Minsan hindi niya alam that the statement is not really presidential," sabi ni Gordon.—FRJ, GMA News