Patuloy na pinaghahanap ng Philippine Drug Enforcement Agency (PDEA) ang isa nilang tauhan na hinihinala nilang dinukot.

Sa inilabas na pahayag ng PDEA, sinabing June 25 nang hindi na makita si Investigation Agent I Merton T. Fesway.

Iniutos ni PDEA Director General Wilkins Villanueva na bumuo ng “Task Force Fesway,” na kabibilangan ng 24 na intelligence and investigation team para mahanap nawawala nilang kasamahan.

 


Sa imbestigasyon, mayroon umanong tatagpuin na confidential informant si Fesway bago siya nawala.

Tubong-Samoki, Bontoc, Mountain Province ang 38-anyos na si Fesway, at nakatalaga sa PDEA Regional Office III Pampanga Provincial Office sa Angeles, Pampanga.

“Hindi kami titigil sa paghahanap hanggang matagpuan namin si Fesway. Umaasa kami na siya ay ligtas at nasa mabuting kalagayan,” ayon kay Villanueva.—FRJ, GMA News