Nanumpa nitong Martes si Makati City Mayor Abby Binay bilang miyembro ng Nationalist People’s Coalition (NPC). Habang si Cebu Governor Gwendolyn Garcia, tumiwalag naman sa Partido Demokratiko Pilipino - Lakas ng Bayan (PDP-Laban).

Sa magkahiwalay na post sa X ng Super Radyo dzBB, makikitang nanumpa si Binay bilang bagong miyembro ng NPC kay Rizal Representative at party stalwart Jack Duavit.

Kasama ni Binay ang kaniyang asawa para saksihan ang panunumpa niya sa NPC, kasama rin sina Makati Rep. Luis Campos, at Presidential Legislative Liaison Office head Mark Leandro Mendoza.

“Mayor Abby Binay is a highly respected and multi-awarded chief executive. We must not forget that she is also a veteran legislator having served as one of the Representatives of the City of Makati,” sabi ni Duavit sa GMA News Online.

“She brings experience, energy, and vision [to the party],” dagdag niya.

Huling termino na ni Binay bilang alkalde ng Makati, at kabilang siya sa posibleng maging pambato ng NPC sa senatorial race sa 2025 elections.

Kapatid ni Binay si Sen. Nancy Binay, na matatapos naman ang termino sa pagka-senador sa 2025.

Nagpahayag ng interes si Nancy na tumakbo namang alkalde ng Makati.

Sa pahayag, nagpasalamat si Mayor Binay sa tiwala sa kaniya ng pamunuan at mga miyembro ng NPC.

''The midterm election is still a year away. For now, I will continue to fulfill my pledge to my beloved Makatizens to continue making our services better and promote our city as a major tourist and investor destination,” anang alkalde.

“The issues facing our country should be seen as a chance to work together and find common purpose rather than opportunities to sow division,” dagdag pa niya.

Kamakailan lang, nakipag-alyansa ang NPC sa partido ni Pangulong Ferdinand "Bongbong" Marcos Jr., na Partido Federal ng Pilipinas (PFP), na kaalyansa rin ang Lakas-CMD, na kinabibilangan ni Speaker Martin Romualdez.

Pagtiwalag ni Gov. Garcia sa PDP-Laban

Samantala, tumiwalag naman sa Partido Demokratiko Pilipino - Lakas ng Bayan (PDP-Laban) si Cebu Governor Gwendolyn Garcia.

Sa kaniyang sulat sa pamunuan ng partido, inihayag ni Garcia sa kaniyang pagbibitiw ang reklamong isinampa laban sa kaniya ng kapartido na si Cebu City Mayor Michael Rama.

Ang reklamo ay tungkol sa pagpapatigil sa ginagawa sa Cebu Bus Rapid Transit  (CBRT) sa Osmeña Blvd. sa bisinidad ng Cebu Provincial Capitol Building.

“While I am confident in the legality and ethical soundness of my actions, the resulting situation, including Mayor Rama’s call for my suspension, has made continued association with the party untenable,” ani Garcia sa sulat niya kay PDP-Laban president Jose Alvarez.

Una rito, naglabas ng memorandum si Garcia noong Pebrero para sa CBRT team dahil “bus stations that will be built along Osmeña Boulevard right in front of the Capitol Building will have a negative impact on the cultural integrity of the building.”

Pero iginiit ni Rama sa kaniyang reklamo na walang karapatan si Garcia na makialam sa trabaho ng Cebu City dahil isa itong highly urbanized city at dapat malaya mula sa pamahalaang panlalawigan ng Cebu.

Dahil sa hidwaan kay Rama, sinabi ni Garcia na ang pag-alis niya sa PDP-Laban ang makabubuti para sa lahat.

“Upholding my personal and professional values, while avoiding any actions that could be detrimental to the party, is of paramount importance,” anang gobernadora. “The current situation has unfortunately created an environment where my continued membership would be inimical to both the party and myself.”

Nagpasalamat naman si Garcia sa pagiging bahagi ng PDP-Laban mula noong 2012.-- FRJ, GMA Integrated News