Ilang pasaway na motorista ang hinuli matapos silang dumaan sa EDSA Busway sa Ortigas.<br /><br />Sa ulat ni Bam Alegre sa Unang Balita, sinabing muling nagsagawa ang Special Action and Intelligence Committee for Transportation (SAICT) ng operasyon sa EDSA-Ortigas nitong umaga at rush hour ng Martes.<br /><br />Ilang motorista na ginamit ang EDSA bus lane ang inabangan ng mga operatiba, sinita at binigyan ng mga penalty ticket pagbaba nila ng Ortigas Flyover.<br /><br />Depensa ng isang rider, nagmamadali siya sa trabaho habang ang isa naman, sinabing ngayon lamang siya dumaan ng EDSA.<br /><br />Ang operasyon ng SAICT ay bahagi ng kanilang kampanya na siguraduhing nakalaan lamang para sa mga bus ang bus lane. <strong>—Jamil Santos/ VAL, GMA Integrated News</strong>
