Pinagtibay ng Korte Suprema ang nauna nitong desisyon na nagdeklarang labag sa Konstitusyon ang Articles of Impeachment laban kay Bise Presidente Sara Duterte, ayon kay court spokesperson Atty. Camille Ting nitong Huwebes.
“By a unanimous vote of all those participating, the SC En Banc denied with finality the motion for reconsideration filed by the House of Representatives which sought to reverse the decision… that declared the Articles of Impeachment against Vice President Sara Duterte as unconstitutional,” pahayag ni Ting sa press briefing.
“It affirmed that the fourth impeachment complaint transmitted to the Senate on February 5, 2025 was already barred by the Article XI, Section 3, Subsection 5 of the Constitution,” dagdag niya.
Ipinahayag ang resolusyon nitong Miyerkules, Enero 28.
Sinabi ni Ting na naka-leave si Associate Justice Maria Filomena Singh, habang hindi naman lumahok sa botohan si Associate Justice Benjamin Caguio.
Ayon sa tagapagsalita, agad na ipatutupad ang resolusyon sa sandaling maihatid ito sa lahat ng partido.
“No further pleadings will be allowed,” dagdag niya.
Noong Hulyo 2025, nagkakaisang nagpasya ang mga mahistrado ng SC na saklaw na ng one-year rule ang Articles of Impeachment sa ilalim ng Article XI Section 3 paragraph 5 ng Konstitusyon.
Kasama sa desisyon ng mga mahistrado na nilabag sa mga artikulo ang right to due process ni Duterte.
Matatandaang tatlong reklamong impeachment ang inihain laban kay Duterte noong Disyembre 2024, na pawang may kaugnayan sa umano’y maling paggamit ng confidential funds.
Ang ikaapat na reklamong impeachment ang inendorso ng mahigit na one-third ng mga mambabatas mula sa Kamara de Representantes, na ipinadala na sa Senado kalaunan bilang Articles of Impeachment.
Pagkaraan nito, naghain ang Kamara ng mosyon para sa baligtarin ang desisyon, at iginiit na ang pag-archive ng unang tatlong reklamo ay ginawa matapos maipadala ang ikaapat na reklamo, kaya hindi umano nagsimula ang one-year ban.
Sa desisyon nito, nilinaw ng SC na ang unang tatlong reklamong impeachment na inihain alinsunod sa unang paraan ay hindi nailagay sa Order of Business sa loob ng itinakdang 10 session days.
Sinabi rin nito na ang “session days” para sa impeachment complaint ay hindi nangangahulugang legislative session days.
Ayon sa SC, ang session day para sa layunin ng Article XI ay binibigyang-kahulugan bilang isang araw sa kalendaryo kung kailan may sesyon ang Kamara.
“What I can say is this decision of the court made sure that the constitutional rights are still protected in impeachment proceedings and it actually expedited the proceedings with its interpretation of session days,” ayon kay Ting.— Joahna Lei Casilao/FRJ GMA Integrated News
