Kapuso na ang singer, radio DJ at host na si Joyce Pring matapos pumirma ng exclusive contract sa GMA Network nitong Miyerkules.
Pag-amin ni Joyce, hindi raw niya inaasahan na darating ang pagkakataon na may TV network na magtitiwala sa kaniya.
"It's incredible. I feel super blessed. At saka, sobrang kinakabahan ako, hindi ko alam kung bakit. Siguro for the longest time, I always wanted to do what I love, never akong nag-expect na magkakaroon ako ng ganitong opportunity so I feel really blessed," saad niya.
Dumalo sa naturang contract signing sina President for Alternative Productions Gigi Santiago-Lara at GMA Entertainment TV Senior Vice President Lilybeth Rasonable.
Naniniwala si Joyce, na mas matutulungan siya ng network tungkol sa mga pinaplano pa niyang gawin.
"Excited and overwhelmed. First time ko rin magkakaroon ng management talaga as a host and everything else that I do," ani Joyce na may hugot pang, "Okay lang pala mabasag ang puso mo, basta maging Kapuso ka."
Kabilang naman sa mga nais niyang makatrabahong Kapuso ang master comedian na si Michael V.
"Mas gusto ko 'yung comedy, gusto ko 'yung happy lang tayo. Tsaka kung makakatrabaho ko si Bitoy, sobrang dream come true 'yon," pahayag nito
Nais din niyang makasama sa proyekto sina Solenn Heussaff at Rhian Ramos, at maging leading man si Dennis Trillo.
"Meron akong crush dati kay Dennis. Kasi magaling siyang aktor so natutuwa ako sa kaniya," ayon kay Joyce.
Hangad din niyang magkaroon ng solo album.
"Hopefully. Definitely I love to do that kasi for the longest time, hindi ko siya magawa. Siguro wala akong team to help me go about it. Siyempre kung busy ka, wala rin namang mag-aasikaso for you, so ngayon, since may support system, mas madali sigurong gawin 'yung mga ganu'n," patuloy niya. -- FRJ, GMA News
