Mapapanood sa una niyang pelikula ang batang "Eat Bulaga" dabarkads na si Baeby Baste sa MMFF entry na "Meant To Beh," kung saan makakasama niya ang kaniyang crush na si Gabbi Garcia.
Sa Star Bites report sa GMA News "Balitanghali" nitong Biyernes, sinabi ni Baeby Baste na ayaw daw niyang mag-boyfriend si Gabbi.
"Opo may Uyab na siya, pero crush ko rin si Ate Gabbi (Garcia). Ayaw ko siyang may boyfriend kasi crush ko siya," sabi ni Baste.
Bukod pa kay Gabbi, makakasama rin ni Baeby Baste sa "Meant To Beh" sina Bossing Vic Sotto, Dawn Zulueta, Andrea Torres at Ruru Madrid.
Ayon kay Baeby Baste, magiging makulit daw ang role niya sa pelikula bilang si Riley.
"Sa movie ang pangalan ko si Riley. Umiiyak din ako. Nakakatawa, tapos makulit ako," sabi ng cute dabarkads.
Wish naman ng bata ngayong Pasko na maraming manood sa kaniyang kauna-unahang movie na "Meant To Beh."
Hiling din niya kay Santa Claus na mabigyan siya ng mga gift na ibibibay naman daw niya sa mga kawawang babies.
Sinabi naman ni Baste na proud sa kaniya ang kaniyang best friend na si kuya Alden. -- Jamil Santos/FRJ, GMA News
