Hindi lang kuwela at nakakatuwa, ngunit mga maiinit na eksena rin ang maaabangan sa upcoming GMA series na "Inday Will Always Love You," kaya naman "in love" sina Barbie Forteza, Derrick Monasterio, at Juancho Trivino sa bago nilang show.
Sa Star Bites report ni Lhar Santiago sa GMA News "Balitanghali" nitong Huwebes, sinabing nakaka-relate sina Barbie, Derrick at Juancho sa kanilang mga karakter na sina Happylou, Patrick at Ernest.
"Very relatable, napanood na namin 'yung pilot episode namin, 'yung raw edit, and very promising, grabe!" sabi ni Barbie.
"Lahat sila, lahat kami, ginagampanan naming mabuti ang characters namin. Consistent, lalo na si Barbie actually," ayon naman kay Derrick.
"Ang dapat abangan ng mga tao dito is 'yung chemistry ng cast na 'to dahil we're a weird group, napakasaya namin off-cam," sabi ni Juancho.
Natapos na ang shooting nila ng ilang episodes, kung saan tampok din ang ilang magagandang lugar sa Cebu.
"'Yung character ko po, masungit siya in a way na nagpapakaseryoso lang sa business, pero kaya dumating si Happylou sa buhay niya kasi siya 'yung magbibigay ng sunshine," sabi ni Derrick.
"Hindi kami naging friends agad, unlike kami ni Juancho, mag-best friends talaga kami," ayon kay Barbie.
"I'm sure maraming makaka-relate sa character ko dahil may mga kaibigan talaga na may secret na pagtingin sa [best friend] nila," ani Juancho. — Jamil Santos/BAP, GMA News
