Pumanaw na ang beteranang aktres na si Gloria Romero, na kilala bilang "Queen of Philippine Cinema," sa edad 91.

Kinumpirma ng kaniyang pamilya sa pamamagitan ni Maritess Gutierrez, anak ni Gloria, ang pagpanaw ng aktres.

"It is with great sadness [that I] announce the passing of my beloved mother, Gloria Galla Gutierrez, aka Gloria Romero, who peacefully joined our Creator earlier today, January 25, 2025,”  saad ni Maritess sa Facebook post.

Gaganapin ang burol ni Gloria sa Arlington Memorial Chapel, Quezon City.

"In this time of loss, our family deeply appreciates the support, prayers, sympathy, all the lovely messages, and heartfelt condolences that we've received. She will surely be missed dearly," dagdag ni Maritess.

Ilan sa mga hindi mabilang na pelikulang kaniyang ginawa ang Palasig (1952), Cofradia (1953), Kurdapya (1954), Dalagang Ilocana (1954), Sino Ang May Sala? (1957), Lipad, Darna, Lipad! (1973), Bilangin ang Bituin sa Langit (1989), Tanging Yaman (2000), Bahay Ni Lola (2001),Magnifico (2003), at Rainbow's Sunset (2018).

Si Gloria ang pinaka nakatatandang babae sa edad 85 na manalong Best Actress sa 2018 Metro Manila Film Festival para sa Rainbow's Sunset. Tatlong beses din siyang wagi sa FAMAS Awards, dalawa sa Gawad Urian Awards, at tatlo sa Metro Manila Film Festival.

Nakatanggap din siya ng tatlong Luna Awards mula sa Film Academy of the Philippines at dalawa sa PMPC Star Awards for Movies. Best Comedy Actress din siya sa PMPC Star Awards for Television para sa sitcom na Palibhasa Lalake (1987).

May internasyonal din siyang pagkilala para sa Rainbow's Sunset, kung saan wagi siya ng dalawang International Film Festival Manhattan Awards for Best Actress and Best Ensemble Acting.

Sa Kapuso Network naman, napanood siya sa Munting Heredera (2011), Forever (2013), Niño (2014), at supporting role sa The Rich Man's Daughter (2015), Juan Happy Love Story (2016) at Meant to Be (2017).

Napanood din si Gloria sa drama fantasy anthology na Daig Kayo ng Lola Ko, na nagwagi ng tatlong PMPC Star Awards for Television bilang Best Horror/Fantasy Program. — VBL, GMA Integrated News