Ibinahagi ni David Licauco ang mga hindi niya malilimutang alaala ng namayapa niyang lolo na si Jaime Licauco na kilalang parapsychologist. Isa na rito ang ginawa pagbaluktot ng kaniyang lolo sa tinidor sa pamamagitan lang umano ng isip.Sa ulat ni Aubrey Carampel sa GMA News "24 Oras" nitong Lunes, sinabi ni David na lagi niyang binibisita ang kaniyang lolo Jaime sa Parañaque."Nag-uusap kami, he's very smart, he knows a lot about life kaya the past couple of months talagang I would make sure to really spend time with him," saad ng aktor sa burol ng kaniyang lolo.Tandang-tanda pa ni David kung papaano binaluktot ng kaniyang lolo ang tinidor gamit lang umano ang isip noong bata pa siya."Hawak niya 'yung fork tapos nakatingin lang siya dun and super nag-i-internalize siya, basically parang gusto niya sa 'kin ipakita 'yung power of the mind. And then 'yun, nag-bend 'yung fork, 'di ba, as a kid, sobrang wow, amazing 'yun. Kahit until now sinasabi ko sa kaniya minsan, lolo pakita mo naman sa 'kin," dagdag pa ni David.Isang author, professor, columnist, at kilalang parapsychologist si Jaime, na nakagawa ng 17 libro at ilang artikulo tungkol sa mysticism, inner mind development, creative and intuitive management, at paranormal.Ayon kay David, natutunan niya sa kaniyang lolo na kayang makamit ang hangarin kung ilalagay lang sa kanilang isip."And kapag passionate ka dun sa ginagawa mo na 'yun, talagang ma-a-achieve mo 'yun. Malayo 'yung mararating mo so 'yun, he's just an inspiration to me," paliwanag niya.Ibinahagi rin ni David ang napagtanto niya sa pagpanaw ng kanilang lolo."Itong life na binigay sa 'tin, hindi siya forever, alam naman natin 'yun. I think it's better to be nice to everybody, stop the hate, and really just choose peace over chasing validation and instant gratification, 'di ba? Live happily and tell your loved ones you love them," patuloy ng aktor.Pumanaw si Jaime noong May 15, sa edad na 84. —FRJ, GMA Integrated News
