Naghain ang dating aktres na si Lindsay Custodio ng kasong paglabag sa Anti-Violence Against Women and Their Children Act (Republic Act No. 9262) laban sa kaniyang estranged husband na si Frederick Cale.
Kinumpirma ito ng abogado ni Lindsay na si Atty. Hazel Meking, sa video statement na ipinadala sa GMA News Online nitong Lunes.
“Kinompirma natin na na-file na kanina [ni Lindsay] ang kasong Anti-Violence Against Women and Their Children laban sa kanyang estranged husband,” saad ni Meking sa video.
Ayon kay Meking, kamailan lang lubos na naunawaan ni Lindsay ang bigat ng umano'y pang-aabuso na sinapit ng dating aktres sa kanilang relasyon.
“So, ngayon na-file na natin at inaasahan natin na makakakuha tayo ng hustisya para sa kaniya dahil grabe ang trauma at ang depresyon at ang psychiatric medication niya na dinanas dito,” sabi pa ni Meking.
Ayon kay Meking, nakaranas umano si Lindsay sexual abuse, psychological abuse, maging verbal, emotional, at economic abuse.
Sa isang episode noong March, inihayag ni Boy Abunda sa kaniyang programang “Fast Talk with Boy Abunda” na bumiyahe si Lindsay sa Cebu kaugnay sa cyber libel complaint na inihain nito laban kay Cale.
Sinisikap pa ng GMA News Online makuha ang panig ni Cale kaugnay ng istoryang ito. — mula sa ulat ni Hermes Joy Tunac/FRJ, GMA Integrated News
