Magsasanib-puwersa ang GMA Pictures at Mentorque Productions Inc. para sa paglikha ng bagong horror film na “Huwag Kang Titingin.” Kabilang sa mga bibida rito ang ilan sa dating housemates ng Pinoy Big Brother: Celebrity Collab Edition.
Sa ginanap na story conference nitong Huwebes, kinumpirma na kabilang sa cast ng pelikula ang mga dating housemate na sina Shuvee Etrata, Charlie Fleming, Michael Sager, at Josh Ford. Kasama rin sina Sofia Pablo, Allen Ansay, Marco Masa, Sean Lucas, at Anthony Constantino.
Ayon sa direktor na si Frasco Mortiz, tampok sa “Huwag Kang Titingin” ang pagkahumaling ngayon ng mga Pinoy sa viral internet challenges, na sinamahan ng takot sa mga kuwentong bayan na may kababalaghan o folklore.
Present sa contract signing sina GMA Network Senior Vice President for Programming, Talent Management, Worldwide at Support Group Atty. Annette Gozon-Valdes, GMA Senior Vice President for Public Affairs Nessa Valdellon at Mentorque Productions Inc. Chief Executive Officer John Bryan Diamante.
Inihayag ni Gozon-Valdes ang excitement sa naturng partnership.
“We have a great story, an exciting cast, and a very strong partner in Mentorque,” sabi niya.
“I think that it's our honor to be a partner of Mentor. This is our first venture together,” dagdag ni Gozon-Valdes.
Ipalalabas ang “Huwag Kang Titingin” sa mga sinehan.
Kamakailan lang, naging matagumpay din sa takilya ang horror movie ng GMA Films na P77, o Penthouse 77, na pinagbidahan ni Barbie Forteza, sa direksyon ni Derick Cabrido.
Ang Mentorque Productions Inc. naman ang production company sa likod ng mga award-winning na pelikulang "Mallari," "Kono Basho," at "Uninvited." – mula sa ulat nina Jade Veronique Yap/Jamil Santos/FRJ GMA Integrated News
