Gumising nang maaga ang Sparkle artists at fans para sumali sa kauna-unahang Sparkle Run. Ang mga kalahok para ma-achieve ang kanilang fitness goals, umabot ng mahigit 4,000 runners.

Sa Chika Minute report ni Nelson Canlas sa 24 Oras Weekend nitong Sabado, sinabing sanib-puwersa ang Sparkle GMA Artist Center, City of Manila, at Runrio upang maisulong ang healthy lifestyle.

Pinangunahan ni First Vice President for Sparkle GMA Artist Center Joy Marcelo ang event.

“Ang dami sa kanila na 'yun na talaga 'yung ginagawa. Every weekend, halos like sila Barbie, every weekend ‘yan nagjo-join ng run. So why not do one of our own? It's for awakening them, the other artists also, pati 'yung mga netizens na maging health conscious, running is a way of life,” sabi ni Marcelo.

Kasama ng fans na nakitakbo sina Alden Richards, Barbie Forteza, David Licauco, Kim Ji Soo, Sofia Pablo, Mikee Quintos, Allen Ansay, Royce Cabrera, at iba pa.

Kasali rin sa Sparkle Run ang GMA News reporters and anchors na sina Raffy Tima, Mariz Umali, at Aubrey Carampel.

“Ano sya eh, it's very grounding and parang it's also my escape from reality and time to think, time to be with myself, 'yung walang ibang iniisip, 'yung distance mo lang, 'yung pace mo lang, 'yung kakainin mo lang after,” sabi ni Barbie.

“Ngayon marami nang factors tayo sa buhay na minsan nagiging distracted tayo in our everyday life but I think fitness must not be compromised,” sabi ni Alden.

Ibinahagi rin ng Sparkle Stars ang kanilang must-haves sa kanilang pagtakbo.

“I just wanna listen to music… I usually listen to mga motivational stuff,” sabi ni David.

“Gusto ko ng mga EDM, para upper,” sabi ni Martin Del Rosario.

“Maybe upbeat music so I can run faster,” ani Kim Ji Soo.

“Hindi mawawala 'yung water. Tubig talaga,” sabi ni Allen.

“Cap. Kasi bukang liwayway na mamaya. Like madilim pa now pero later, tirik na 'yung araw,” sabi ni Lexi Gonzales.

“Lippie. Kasi siyempre we're running, ‘di ba? Dapat fresh pa rin,” sabi ni Cheska Fausto.

“Para ‘yung lips namin hindi magda-dry,” pagsegundo ni Charlie Fleming.

“Cellphone and car keys para after the run, pwede akong mag-selfie,” sabi ni Gil Cuerva.

“Actually, I have here a bag. Kung umaraw na meron tayong sunglasses, tapos meron tayong energy gel,” sabi ni Anthony Rosaldo.

“Handheld bag. Kasi hiluhin talaga ako sa init,” sabi naman ni Sofia Pablo.

Dumating naman para makisaya sina Gabbi Garcia, Max Collins, Josh Ford, Will Ashley, AC Martinez, at si Dingdong Dantes.

“Congratulations sa first ever Sparkle Run. Ang saya talaga just bringing everybody together, lahat ng mga Kapuso artists natin. Sama-sama para sa isang healthy activity. The best,” sabi ni Dingdong. — Jamil Santos/VBL GMA News