Kailangan ng Japan ng apat na triple ng dami ng mga dayuhang manggagawa pagsapit ng 2040 para makamit ang puntirya nilang paglago ng ekonomiya, ayon sa isang Tokyo-based public think tanks group nitong Huwebes.
Binigyan-pansin sa pagsusuri ng grupo ang pagsandal ng Japan sa mga migranteng manggagawa dahil sa bumababa nitong populasyon, ayon sa ulat ng Reuters.
Samantalang nagkaroon naman ng pagdududa sa abilidad na makahikayat ng overseas talents dahil sa mahigpit na COVID-19 border controls.
Kailangan umanong mapalaki ng Japan ang bilang ng kanilang foreign workers sa 6.74 milyon sa 2040 para mapanatili ang average annual economic growth na 1.24%, batay sa "bullish high-growth" scenario ng gobyerno sa kanilang long-term projection, ayon sa ulat ng think tanks, pati na ang research arm ng Japan International Cooperation Agency (JICA) na kaugnay sa foreign ministry.
Ang naturang bilang ay halos 300% na mas marami sa kasalukuyang 1.72 milyon na foreign workers, na kumakatawan sa 2.5% ng kanilang lakas-paggawa.
"We must discuss accepting foreign workers with a greater sense of urgency, as the competition for workforce would grow in the future against countries like China," sabi ni JICA president Shinichi Kitaoka sa isang symposium tungkol sa research nitong Huwebes.
"We need to take actions to make Japan attractive in the longer term, a country to be chosen by foreign workers," giit niya.
Batay sa pag-aaral, mawawalan ang Japan ng mahigit 10% ng kanilang domestic workforce sa susunod na dalawang dekada.
Mula noong 2008, nagsimula na umanong bumababa ang bilang ng populasyon ng Japan dahil sa low birth rate. Lumiliit din ang working-age population dahil sa pagtanda ng kanilang mamamayan.
Tinatayang kalahati ng foreign workers sa Japan ay galing sa Vietnam at China.
Inaasahan ng think tanks na dadami ang mga dayuhang manggagawa sa Japan na magmumula sa mga lower-income countries tulad ng Cambodia at Myanmar sa susunod na dalawang dekada.
Gayunman, inaasahan pa rin na kakapusin ang supply ng migrant labor dahil sa kasalukuyang immigration system at kailangan ikonsidera ng Japan ang pagkakaloob ng long-term visas.
Magiging problema rin umano ang mahigpit na border control sa non-Japanese people dahil sa pangamba sa coronavirus.
"If we keep going like this, Japan could become like a deserted village where people are unfriendly to foreigners and fewer newcomers would arrive—it would be a vicious cycle towards downfall," ayon kay Kitaoka.
Noong nakaraang taon, inihayag ng Philippine Overseas Labor Office (POLO) sa isang ulat na pangatlo ang mga Pinoy sa pinakamaraming dayuhang manggagawa sa Japan na umaabot sa mahigit 277,000.
Bago magkaroon ng COVID-19 pandemic, nagawa ng Pilipinas na makapagpadala sa Japan ng mahigit 10,000 OFWs.
Inaasahan na madadagdagan pa ito kapag nagbukas na ang Japan para sa mga dayuhang manggagawa at humupa na ang epekto ng pandemic.
Noong 2019, naglunsad ang Japan ng specified skilled workers (SSWs) program kung saan kukuha sila ng 350,000 foreign workers sa loob ng limang taon.
Pero naantala ang implementasyon nito sanhi ng pandemic.--Reuters/FRJ, GMA News
