Isang 18-anyos na lalaki sa Bohol ang itinuturong pangunahing suspek sa pagpatay sa kaniyang 33-anyos na tiyuhin na direktor sa opisina ng isang state university. Ang hinihinalang ugat ng krimen, ang hindi naibigay na P2,000 na hinihingi ng suspek sa biktima.
Sa ulat ng GMA Regional TV News nitong Huwebes, sinabing unang nakita ang bangkay ng biktima na nakalagay sa sako na iniwan sa madamong bahagi sa Barangay Can-olin sa Candihay, kung saan siya residente.
Pinaniniwalaan na sinakal hanggang sa mamatay ang biktima bago ibinalot ng taped ang katawan at inilagay sa sako.
Sa imbestigasyon ng pulisya, lumalabas na nagalit ang pamangkin sa biktima dahil P1,000 lang ang ibinigay sa kaniya mula sa hinihingi nitong P2,000.
Natukoy ng mga awtoridad ang pamangkin bilang suspek dahil sa nakuhang impormasyon mula sa cellphone ng biktima.
Bukod sa magiging manager sa isang restaurant, nagsisilbing director sa cashier’s office ng isang state university sa Bohol ang biktima.
Una rito, inireport ng pamilya ng biktima na dalawang araw na siyang nawawala.—FRJ GMA News
