Sa panahon na umiiral ang enhanced community quarantine, napuna umano ng Cybercrime Division ng National Bureau of Investigation (NBI) na tumaas ng 100 porsiyento ang mga krimen na may kaugnayan sa paggamit ng internet, partikular ang mga online scam.
Dahil sa ECQ, marami sa mga tao ang pinipili na lang ang online transactions tulad ng pagbabayad ng kanilang mga bill at bumili ng mga pangangailangan. Pero sinasabayan naman ito ng mga nagsasamantala sa pamamagitan ng "phishing" at iba pang online scam para makapagnakaw ng pera at maging ng identity ng biktima.
Sa Unang Hirit, ipinaliwanag ni Victor Lorenzo, Cybercrime Division Chief, NBI, na ang "phishing" ay pagpapadala ng e-mail ng mga cybercriminal para makakuha ng mga detalye tulad ng account information. Kapag nagtagumpay sila na makakuha ng impormasyon, kaya nilang ilipat ang pera ng biktima na nakadeposito papunta sa kanilang account.
Kadalasan umanong ginagaya ng mga cybercriminal ang e-mail ng mga website ng financial institution o bangko, at gagawa sila ng pekeng e-mail para padalhan ang biktima.
Bukod dito, laganap din umano ang mga malicious website kung saan nagla-log in ang mga tao para makuha ang kanilang information, at nanghihingi pa ito ng donasyon para sa COVID-19.
Paalala ni Lorenzo sa publiko, huwag basta-basta maglalagay ng account information, pati ang mga one-time pin na ibinibigay ng mga bangko sa kahit na sinong tumatawag o nag-i-email.
Dapat umanong tandaan na alam ng mga bangko ang inyong mga impormasyon kaya kahit kailan ay hindi nila hihingin ang mga ito.
Mag-ingat din umano sa mga nagte-text o nagpapadala ng mensahe na nanalo ka sa isang pakontes na hindi mo naman sinalihan, at hihingan ka rin ng impormasyon o perang kapalit para makuha ang premyo.
Alamin ang mga legal na hakbang na maaaring gawin sakaling mabiktima ng phishing at iba pang online scam, at kung maaari pa bang maibalik ang nawalang pera ng biktima. Panoorin ang video sa itaas.--FRJ, GMA News
