Kabilang ang Pinay tennis star na si Alexandra Eala at singer na si Zack Tabudlo, sa siyam na entry mula sa Pilipinas na nakasama sa Forbes “30 Under 30 Asia” list ngayong taon.

Ang naturang listahan ay kumikilala sa mga negosyante, lider, at innovator sa buong Asia-Pacific region na itinuturing na “pushing the boundaries” sa kani-kanilang larangan.

Pinili ang mga nasa listahan mula sa halos 4,000 kandidato na sinuri ng Forbes Asia team at panel ng mga hurado sa pamamagitan ng iba’t ibang batayan tulad ng pondo at kita, dating sa lipunan at industriya, pagiging angkop ng produkto sa merkado, pagiging malikhain, at potensyal.

Kasama sa listahan na mula sa Pilipinas ay sina:

  • BayaniChain Tech cofounders Raphael Sevilla at Brandon Angelo Wong
  • Tennis player Alexandra Eala
  • Singer-songwrite Zack Tabudlo
  • Amico Innovations cofounder Kharl Christian Yeung
  • Fan connection SEA cofounders Pauline Dizon at Adrian Jumangit
  • GoRocky cofounders Kiyanusch Braun at Martin Joaquin Palaña
  • ASEAN Youth Advocates Network founder Emmanuel Mirus Ponon
  • Empath founder Steph Naval
  • Siklab founder Saje Miguel Molato

“The 11th edition of the Forbes 30 Under 30 Asia list spotlights a fresh wave of young minds from across Asia Pacific, who continue to innovate and disrupt their industries at a time when artificial intelligence is reshaping our daily lives,” saad sa email statement ni Forbes Asia editorial director Rana Wehbe Watson.

“From entrepreneurs building companion robots and AI tools to up-and-coming stars stepping into the global spotlight, this year’s listees illustrate Gen-Z’s influence across business and culture in the region,” dagdag niya.

Sakop ng listahan ang 10 kategorya: AI; Consumer & Enterprise Technology; Entertainment & Sports; Finance & Venture Capital; Healthcare & Science; Industry, Manufacturing & Energy; Retail & Ecommerce; Social Impact; Social Media, Marketing & Advertising; at The Arts.

Ang India ang may pinakamaraming entry ngayong taon na may 78, sinundan ng China na may 46, Australia na may 38, at Japan na may 32. Ang Indonesia, Singapore, at South Korea naman ay may tig-18 na entry. — FRJ GMA News