Malaki ang ulo, matatalas ang mata at matutulis ang bibig, kamangha-mangha ang mga snakehead fish o “Toman” dahil kaya nitong mabuhay ng apat na araw nang walang tubig. Ngunit sa Calumpit, Bulacan, itinuturing itong “invasive species” dahil kinakain nito ang mga native at endemic na isda.
Sa Born To Be Wild, itinampok ang angler at guide na si Christian “Irish” Balagtas, na nanghuhuli ng mga Toman, na umaabot ng hanggang 15 kilo ang bigat.
Native o nagmula ang Toman sa bansang Indonesia, Malaysia at Thailand. Ngunit dahil sa sport fishing, nakarating umano ito sa Pilipinas.
Sa pagsama ni Doc Ferds Recio kay Irish sa paghuli ng Toman, isang patay na native na karpa na kalahati na lamang ang katawan ang bumungad.
Dahil territorial ang Toman, kakagatin nito ang kahit anong isda na dumaan sa teritoryo niya-- maliit man o malaki.
Sa malapitang tingin, tila ahas ang snakehead dahil sa hitsura nito at kaliskis. Kaya rin nitong huminga kahit mababaw ng tubig, o kahit wala sa tubig.
Kaya umanong mabuhay ng isdang ito nang wala sa tubig sa loob ng apat na araw. Voracious eaters ang mga ito, na may hanggang apat na layer ng ngipin sa mandibles.
“So, itong mga ganitong isda, can actually eat a rat already. All that characteristics, at wala din silang known predator dito except for man, kaya sila tinaguriang invasive species,” sabi ni Doc Ferds.
Pinaniniwalaan din na unti-unting nauubos ng mga Toman ng mga native na isda sa ilog ng Calumpit kaya peste rin ang tingin ng iba sa kanila.
“Dumami na lang po sila rito. Ang mga snakehead na ‘yan, kinakagat ngayon 'yung mga tunay na tilapia saka tunay na bulig. Sila na po ang pumapalit ngayon,” sabi ni Irish.
Kaya nagpayo ang mga eksperto na kainin at huwag basta-basta pakakawalan sa ilog ang mga Toman.
Tunghayan sa Born To Be Wild ang isa pang invasive species na cream dory na matatagpuan naman sa Marikina River. Panoorin ang video. – FRJ GMA News
