Nagsalita na si Heart Evangelista tungkol sa estado ng buhay may-asawa nila ni Senator Chiz Escudero, matapos biruin si Escudero ng mga kapwa senador tungkol sa lovelife nito.
“Nakakahiya, umabot pa kami sa Senado. But it’s nice to see everybody supportive of one another,” sabi ni Heart sa Chika Minute report ni Nelson Canlas sa 24 Oras.
Nakasama kamakailan ni Heart si Senator Escudero sa Paris kung saan dumalo sila ng Paris Couture Week.
“First time during the Paris Couture Week, which was not his thing. So mas lalo siguro siyang nakakatulong na naging masaya ako with my work, with my life, because I’m supported,” sabi ni Heart.
Susunod nang plano ni Heart ang mag-Milan at bumalik sa Paris para sa trabaho.
Aayusin din ni Kapuso Queen of Creative Collaborations ang kaniyang Parisian apartment bago niya ito ipakita sa mister sa kaniyang susunod na trip.
Pinakamalaking natutunan ni Heart bago ang kaniyang kaarawan sa Valentine’s Day: “You become happy when you embrace your growth and the people around you support you. My husband has been very supportive lately.”
Todo-suporta rin sa kaniyang mga proyekto ang kaniyang Kapuso family.
Sa kanilang sandaling biruan sa sesyon ng Senado, napansin ng mga senador ang pagiging masaya at masiglang aura ni Escudero na matagal na raw nilang hindi nakikita sa mukha ng mister ni Heart.
"Together with each and every member of this body, I would like to warmly welcome our colleague and my seatmate, Senator Chiz. First time in a long time we’ve seen that smile on his face with a wonderful aura and I think if there is anything we learned from this, love is worth fighting for," saad ni Senadora Grace Poe sa kaniyang pagbati kay Escudero.
Paliwanag ni Senate President Miguel Zubiri, sinuspinde niya ang kanilang sesyon para magbigay-pugay kay Escudero.
"I wanted to go down and also give a big hug to my dear friend and classmate in Congress. We believe in second chances," sabi ni Sen. Zubiri.
"Mr. President, we heart Chiz!" hirit naman ni Sen. Joel Villanueva. —Jamil Santos/LBG, GMA Integrated News